ஊரில் இல்லாத நாட்களில்

என்னால் மட்டும் வீடு திறக்கப்படுகிறது 

உலராத என் ஆடைகளின் ஈரத்தை
அறையின் வெக்கை தின்று கொண்டிருக்கிறது

நேரமும் சோப்பும் மெதுவாகத்தான் கரைகின்றன

கேட்கப்படுவதற்கு என்னைத்தவிர அவளும் இல்லாததால்
அறைக்குள் குழப்பத்துடன் அலைந்து கொண்டிருக்கிறது
பிரியத்துடன் நாங்கள் கேட்கும் பாடலொன்று

 அவ்வப்போது கடிகாரம் மின்விசிறி போலவும்
மின்விசிறி  கடிகாரம்     போலவும் சுற்ற கனாக்கண்டேன்

 கழுவாத தேநீர்  கோப்பைகள் என்னைப்பார்த்து
எப்போதும் தங்களுக்குள் எதோ பேசிக்கொள்கின்றன

நாட்கள் நாட்காட்டிகளில் நிரம்பிவழிகிறது
குப்பைக்கூடை இன்றும் கூட  நிரம்பவில்லை
 
அவள் வரைந்து வைத்த சித்திரத்தாளில்
 சிலந்திவலை பிண்ணிக் கொண்டிருக்கிறது - கலைக்கவில்லை

சமையல் சமைப்பதற்கு காத்துக்கொண்டிருக்கிறது

 மெழுகுவர்த்திகள் கொளுத்தாமலே உருகி வழிந்தன 
மழையும் மனைவியும் ஊரில் இல்லாத நாட்களில் ......  

பிலால் ராஜா