வெள்ளப்பெருக்கு
வெள்ளம் போல்
எங்கோ பெருவெளியிலிருந்து
பெருக்கெடுத்து வரும் முத்தங்கள்
வேக வேகமாக
என்னில் நிரம்பின
அபாய மட்டம் தாண்டி
முழுக்கொள்ளளவை எட்டி
என்னில் தளும்பித்தெறித்தன
முத்தங்கள்......
கடலினும் பெரிய
இந்த முத்ததேக்கம்
அழுத்தம்தாளாது
என்னுடல் செல்களின்
நுண் இடைவெளியில்
பீறிட்டு கசியத்துவங்கியது
என்றாவதொருநாள்
இவ்வழுத்தம்
என்னை முழுமையாக
உடைத்துவிடக்ககூடுமென்பதால்
முத்தங்களை வெளியேற்றும்
ரகசிய மதகினை
என் புலனெங்கும் தேடினேன்
மதகினை கண்டடையமுடியா களைப்பில்
கண்ணயர்ந்தபோது
கனவில் வந்த
குருட்டு சர்ப்பம் வழி காட்ட
கண்டடைந்தேன் அம்மதகினை
முத்தத்தின் அழுத்தங்கள்
அம்மதகின் வழி வெளியேற்றும் போதுதான்
உணரத்துவங்கினேன்
புதிய முத்தப் பெருவெள்ளமொன்று
முன்னைவிட அடர்வேகமாக
என்னில் நிரம்புவதை
யா. பிலால் ராஜா