காலடிச்சில்லறை

காலடிச்சில்லறை

மோசசின் கடல்பிளந்த கைத்தடி

இயேசுவின் மீதறையப்பட்ட ஆணி

புத்தரின் பிச்சை பாத்திரம்

சாக்ரடிஸ் விஷமருந்திய கோப்பை

சீசரின் நெஞ்சறுத்த வாள்

கொலம்பஸின் திசைகாட்டி

அசோகர் நட்ட முதல் மரம் 

இவைகளை இன்றைய தினம்

தேடிக்கண்டறிவதை காட்டிலும்

கடினமெனத்தோன்றுகிறது

மாநகரப்பேருந்து  நெரிசலில்

காலடியில்  தவறவிட்ட

சில்லறையை கண்டுபிடிப்பது

யா. பிலால் ராஜா

இளமை

நேற்றிரவு கனவில் கடந்துபோன படகு
இன்றிரவு நிஜத்தில் திரும்புமென
ஒரு  காற்றற்ற கிரகத்தின்
கானல் நதிக்கரையில்  காத்திருக்கையில் 
வேரினில் படாத நீரைப்போல
இலக்கை இழந்து

என்னைக்கடந்து போய்க்கொண்டிருந்தது 

என் இளமை.

யா. பிலால் ராஜா